اوچوروم

                                                        ایلقار موذن زاده خییو لو

اؤنومده بیتمیش داغین زیروه سینه چیخیرام. دومانلانیر هاوا، یولومدان جاییرام. آیاغیمین آلتیندا قورخونج بیر اوچوروم گؤیه ریر. دیغیرلانیب باشی بئینی پارتلاییب سیلدیریم لارا سپه له نیر، آیاغیمین آلتیندان قاچان داشلار. گوپبولتویله داشلارین باشیندا چارتلاییر، قورخولاریمین شوشه لیگی.

بیر منم، بیر ده توپلومون گؤوده سیندن گؤیه رن داغ. داشا چئوریلمیش لرله بوتون له شه ن بیر شهر، داش اینسان، شهر داشلاریم. قیشقیریرام ائهئی تانریم! بیر اووسونجو ایسته ییر بو شهر. داغلار سسیمی قایتاریر. یالقیزلیق قیشقیریر ایچیمده، باغیریرام آمااان تانریم... اوزالت اللرینی اوجالت گؤیلره، توپلومون گؤوده سیندن گؤیه رن درد داغدان دا اوجا.

سس سیز لیک رقص ائدیر دؤرت بیر یانیمدا. بیر قاری قادین کیمی، قیرمیزی گؤزلو، تیکان ساچلی، قوللاری ایلان. اینسانلارین داشلیغیندان گؤیلره یوکسه لن داغ، اوره ییمین دامارلارینی دارالدیر قیشقیر دیر ایچیمده کی اوشاغی. کؤنلومده دارالان دامارلارین سئله دؤنموش چایلارینی، فیشقیردیر گؤزلریمده ن.

گئری قاییدیرام ساوالان حسرت له آنیمسانیر بئینیمده، یول اوزونو آل بویالی بایراقلارلا بیر قارا چوخا کیمی گؤستریجیم اولوردو، اللریمدن یاپیشیب زیروه یه چیخاردیردی. آآآه نه قدر داریخدیرجی و سارسیدیجی دیر بو سایخاشلیق، یولداشسیزلیق. داغین بایراقسیزلیغیندا ایت اولاییر. بو تپیک دؤیولمه یه ن داغین کؤکسو، هئچ ده توختامیر قانی دایانمیر. قاسناق باغلامایان یارا کیمی یئپ یئنی دیر بو داغ. آددیملانمایان یولار جاق کوبود. دام بویدا داشلارین آغیرلیغی چؤکور اوره ییمه، هوپور ایچیمین دنیزلیگینده. باساماق باساماق(پیلله) دؤزوم داشلارینی، سیلدیریملی یولاری، اوجا اوجا اوچماق ایسته ییر خیالیمین قوشو.

آآآه یوخلوغون؛ ساییلمایان اولدوزلار قدر اؤزلم لی، تانینمایان آیلار سایاق اؤزگه، بولونمایان اوزای لار جاق اوزاق. آذربایجان قدر نیسگیللی. آغیر چؤکورسن اوره ییمه. دئپرم دوشور داغین دویغولارینا. سن سیزلیگین باغری یاریلیر، سیلدیریم سیلدیریم، قایا قایا. یئددی مین ایللیک قانا قاریشمیش بیر قاینار قیمیز سوزولور داغین یارالاریندان، سئل بوینوزونا گؤتورور منی. ساللانیرام اوچورومدان؛ اوجو بو جاغی گورونمه یه ن بیر دره نین درینلیگینده داشی تورپاغی جایناقلاییرام. الیم ایلیشیر بیر آغاجین اپریمیش کؤکونه. گئت گئده اغاجین کؤکو اوزولمه یه باشلاییر. تورپاق بیتیر باشیمدان. آغاجین کؤکونده کی تیریشکه لی زوغدان تیکان دوغولور. یوموروغومون ایچینده اویناییر تیکان. گونشین بالتالی ایستیلیگینده دالانیر آغاجلیغیم. پارالانیب اورتادان بؤلونوره م آراز دولور گؤزلریمه. دویغولاریم اوچوومدان دیغیرلانیب داشلارا یاخیلیب بئینی داغیلیر. یالنیز کیر لی قوزغون لاردیر منه یاردیم ائتمه یه قانادلانانلار.

سارالمیش بیر یارپاق کیمی بوللانیرام حایاتین سون باهاریندا. آغاجین کؤکو ائشه له نیر. بیر میشوو دیبینده ن چیخیر؛ سالانیب قونور بورنومون اوستونه، قولاغیمی چئینه ییر، گؤزلریمی، سونرا ایسه دیلیمی. طالعیم سیبئر یادا 40 درجه صیفیردان آشاغی دا یاتمیش بیر کیمسه کیمیُ، اسنه مه یه باشلاییرُ، وارلیغیم یوخلاییرسا دونوب اؤله جه یینی بیلیر؛ آنجاق...